Учкўприк тумани ҳокими ўринбосари Дилмурод Карабаев, “Қўқон” эркин иқтисодий зонаси раҳбари Фаррух Раҳмонов ҳамда бир гуруҳ тадбиркорлар айни кунларда ҳудудлараро инвестициявий ва савдо-иқтисодий ҳамкорлик алоқаларини кенгайтириш мақсадида амалий ташриф билан Хитой давлатида бўлиб турибди. Ташриф доирасида делегация аъзолари Хитойнинг қатор йирик компаниялари ва ишлаб чиқариш корхоналарида бўлиб, туманимиз ҳудудида инвестицион лойиҳаларни амалга ошириш бўйича ҳамкорлик истиқболларини муҳокама қилмоқда. Хенан провинциясининг Ченжоу шахридаги “Henan Qinghe Industrial” корхонаси вакиллари билан учрашувда “Қўқон технопарки” махсус саноат зонаси ҳудудида алюмин профиллар ишлаб чиқариш бўйича лойиҳани йўлга қўйиш масаласи кўриб чиқилди. Учрашув давомида 15 миллион доллар миқдорида хорижий инвестиция киритишни кўзда тутадиган мазкур лойиҳани амалга ошириш бўйича дастлабки келишувга эришилди. “Henan Qinghe Industrial” корхонаси вакиллари август ойи давомида Учкўприк туманига ташриф буюриб, мазкур лойиҳа юзасидан якуний музокара ўтказишларини маълум қилишди.